会员故事

世上冇必赢嘅赌局，怕输唯一嘅方法就系唔赌。有人话人生就系一场赌局，每一日、每一个决择都系一个个赌局，包括婚姻都系一场赌局。有人好怕输，因为佢曾经输过，佢输过一次就唔想输第二次，所以佢不断要求我承诺佢会一生不变爱佢，唔可以抛弃佢。因为有咗嘅失败，佢怕失去、怕被抛弃，所以佢捉得我好紧，紧到有时会令我喘唔过气。婚姻系要靠两个人共同努力去经营，而唔系一味单方面去要求对方。如果我系用一个人嘅自由快乐去赌婚姻，想喺婚姻呢场赌局上赢得两个人嘅甜蜜快乐，咁我已经系输得一败涂地了。我宜家一啲都唔快乐，亦唔觉得甜蜜，我觉得好压抑，好似个惊弓之鸟咁，惊稍一不慎讲错一句说话、一件小事都会带动佢伤感嘅情绪，然后就喋喋不休咁喺度问我问题，反复咁要我承诺佢之前早已承诺过嘅事。我觉得好烦、好辛苦。其实咁样嘅生活，佢自己同样过得辛苦，但系佢又唔肯放手，每次要分手，佢都喊得死去活来，喊到我都心软唔敢走，继续两个人并唔快乐嘅生活。好似一潭死水咁嘅生活仲会有乜嘢乐趣？